《我一直都覺得...一個人嘅第一份工，唔應該係政府工》
今日新聞話本港嘅失業率係九年來嚟嘅新高，同大家分享一下，幾日前我同一個年青朋友吹水，佢嘅一個嘅想法：
(話說呢個年青朋友做咗嘢幾年) 佢：我有另一個friend 考紀律部隊，一入職訓練緊人工已經四萬，佢仲要同我同年，見到佢買嘢買到勁誇張(指瘋狂shopping) …..
言談之間，呢個年青嘅朋友係透露咗佢嗰份羨慕同妒忌，羨慕人哋有份人工高嘅工，妒忌係佢將自己同呢個紀律部隊朋友比較，覺得自己嘅能力唔喺呢個朋友之下，個朋友竟然會搵到一份人工比佢高咁多嘅工作。
點解我成日覺得，啱啱出嚟做嘢，第一份工唔應該搵政府工：
首先我覺得大家嘅通病係，一野就俾公務員個起薪點同頂薪點， 否定自己嘅可能性。公務員嘅起薪點可能好高，但點解你要一野就覺得，自己呢一世嘅能力，最盡都只係去到個頂薪點嗰度呢？我覺得入職公務員對於一個年青人嚟講，係一個決定去 fix死自己一世人嘅生活，定性咗自己一定要過平庸，穩定嘅生活，否定自己嘅可能性，點解你唔想像下，自己可能係一個成功嘅商家？藝術家？
咁可能你會話，做咗公務員都可以辭職嘅啫，對一個年青人來講，做咗公務員係入咗一個comfort zone, 你嘗咗甜頭，就唔會輕易走，入咗公務員體制，係未冒險已經諗住settle down 。
而我覺得最弊嘅係，大部分人都唔係咁鍾意公務員份工，例如，我真係冇聽過邊一個人，佢嘅志向係成為獄卒，只係覺得獄卒薪高糧準。 如果你根本唔鐘意份工，只係為咗錢，其實係用緊錢買斷咗你嘅dream。
講返呢個年青嘅朋友，我覺得比較之心，人皆有之。 但比較，係唔應該同一個「不怎麼樣嘅人」比較，比較唔應該係比較present, 係要比較outcome 。你一日未死，都唔知埋單計，係咪最快拎到高人工個個，end up 就贏。
相信好多人會話，有和尚邊個想做癩痢，而家食都冇得食，你仲要講追求理想？做公務員點都係一個一生嘅保障，有啲人冒險成世都係得個吉，我覺得做唔做公務員，係一個choice 。但可悲係，公務員由只係一個選擇，變成社會上「最佳」嘅選擇。
我覺得公務員份工就好似公屋，公屋係好好，好多人都羨慕有得住，但你嘅眼界唔應該停留喺有公屋就滿足。公屋其實只係一個救生圈，唔應該係一個目標。如果你嘅目標只係set喺公屋，或者如果大部分人嘅目標只係set喺公屋，個社會係冇奮鬥嘅動力，咁我會對個社會有啲失望。正如英治時代，港英政府係好鼓勵啲人，住緊公屋買居屋，一個正常嘅社會，係應該令到你有動力，想成長，而唔係未奮鬥就諗settle。
而且我一直都覺得根本有啲工作，係唔應該，亦都唔可以first job就做嗰份工，例如老師同公務員。一個老師冇喺社會工作嘅經驗，大學畢業，由學校返學校，你可以有足夠嘅知識傳授學生，但似乎缺乏咗社會嘅眼界同埋經歷。一個公務員，一大學畢業就投身政府，你冇真正接觸社會，點改變個社會呢？你困喺紫禁城就諗住有能力管治天下？唔係唔得，離地囉 ….. 我地有人版：一畢業就入政府嘅林鄭月娥
最後係 ...
If you really want to do government job, make it your second job, not the first job.
Search